شو قصة الجغرافيا؟!

الظاهر انه احنا تعودنا على المرمطة وبالطريق ل نمرمط قضيتنا بالوحل- اذا ما عملناها من زمان-  وواضح انه كلامنا صار من النوع الي بطلع بالليل وبنمحى بالنهار مع انه احنا كبار وبنفهم وحاملين هم الحرية من احتلال عمره ستين سنة، وحضرات المسؤلين بشتغلو بايديهم وسنانهم عشان يأمنو حياة كريمة لشعبهم ومن كثر الخير صار عنا حكومتين متحاربات وكل وحدة بتحاول تتدخل بشغل الثانية، وكل وحدة الها جماعتها برا بتنشر هموم القضية عندهم وبتطلب باسم الشعب منهم، الله يكثر الخير، آمين يارب

وعلى الاغلب الغنج والدلال اليه بمارسوه اخوانا الفتحاويين والحمساويين ناتج عن هالشعور الي كنا نحس فيه بالزمانات الماضية بمعنى شعور انه قضيتنا هي الاولوية عند كل العرب والمسلمين، وكأنه عجلة العالم واقفة عشان فتح وحماس يتصالحوا ، وهالدول المنكوبة الي اقتصادها مضروب وشعبها مش لا قي الخبزبدها تترك كل اولوياتها وتفكر بناس قتلوا بعض عشان السلطة.

المهم مكة المكرمة أقدس بقاع الارض الي شهدت اتفاق متزن وبنهي الخلاف بين الفرقاء ضربناها بعرض الحيط، وصنعاء الي طول عمرها محتضنة القضية ما عجبنا اسلوب اتفاقها اللغوي، والقاهرة الي ذابت من كثر احراجها مش ملحقة على مباحثاتنا الاستراتيجية، كل هدول ما عجبونا فقررنا نروح على دكار حتى نصيغ اتفاق جديد ونتصور ونوقع ونحجز مكان بصفحات التاريخ وبخريطة العالم كمان، الله يعين الجيل الجاي على كتب التاريخ والقضية لأنها رح تكون ملبدة باتفاقات بلا معنى والله يعينهم على كتب الجغرافيا لأنه كل بقعة شهدت اتفاق لازم نشرح عن كل متر فيها، ايييييه الله يجيب الي فيه الخير.