بخصوص الحصار

صار وتحاصر قطاع غزة وعاشوا الناس وحدة من أصعب المراحل الي مرت فيها القضية الفلسطينية، وبقدر الاستغاثة والصيحات والتكبيرات الي وجهناها لكل العرب والمسلمين والانسانيين ما عبرنا حدا الا دولة مصر المسكينة الي قاعدة حاليا بين المطرقة ولسندان، والمخزي بتجربتنا ان أي طاقة هواء تفتح عشان نتنفس منها بنحاول نحتلها ونثبت لكل العالم إنا أقوياء...؟!

ما بعرف ليه المسؤولين بغزة نصبوا أنفسهم أولياء صالحين على رزق أهل غزة وصاروا يتحكموا بالشارد والوارد بحجة "الشروط" الي صارت أحدث عقدة في تاريخ قضيتنا، اذا حكينا واذا قاتلنا وإذا تحاورنا وإذا تصادقنا وإذا "شحدنا" بدنا شروط والمشكلة إنا لحد الان ما بنعرف شو هالشروط...؟!

المهم كل يوم يعقد مؤتمر صحفي ويحل آخر لبحث مسألة المساعدات الي بتوصل غزة، حتى الحصار نسينا وجوده مثله مثل اي مظاهر للإحتلال بتخنقنا، وصلنا لدرجة من الانحطاط بتخلينا نعترض قافلة مساعدات ونتهم بعضنا بالسرقة ونفّضل على الاخوان الي اهتموا بمساعدتنا بحجة وصولها عن طريق اسرائيل، وكأنه قطاع غزة مش محاط بإسرائيل من الجهات كلها وكأنه فكرة الشروط بتنفي فعل "الشحدة" عن المسؤولين وشعبهم، للأسف صار كل واحد فينا يتباهى بغنى الجهة الي بتسانده من الخارج وما فكرنا ولا مرة إنه ما في فرق بين التسول المباشر وغير المباشر خاصة في ظل تفتت علاقات الانتماء والاخوة والدين والقرابة، ولا مرة فكروا المسؤولين بغزة أو الضفة أن الشعب الفلسطيني قادر على ادراك رزقه لو اضطر لتصنيع ذرات الهوا رغم قرفه وحنقه وغضبه من هذه التصرفات الغبية، إذا ابناء الشعب أنفسهم جاهلين بقدرات شعبهم مين العالم بحجم صمود هذا الشعب؟!

نسينا الحصار وصار كل هدفنا نحتل مصر ونسيطر على معابرها ومداخلها وكأننا مفضلين عليها، نسينا الادب والذوق بالتعامل متجاهلين هالكم من الشهدا والاسرى والمطاردين والمناضلين، والاهم متجاهلين الوضع الي بعانوا منه هالناس الصامدين بغزة.

مسكين هالانسان الفلسطيني، كان يفكر انه مشكلة الجوع والحاجة الي بعاني منها بسبب غياب الديمقراطية ولما مارس الديمقراطية وانتخب ربنا رزقه بمسؤولين مش عارفين شو هدفهم وليه قاعدين على الكراسي اصلا، يعني لازم بالنتيجة يعتمد على نفسه لتأمين لقمة العيش من جهة ولهزيمة أكبر قوة عسكرية بالعالم اختارته من بين شعوب الارض لتستولي على ارضه

مسكين هالفلسطيني الي صار أكثر تجارة مربحة هالايام.