مش اول مرة

الروتين والتكرار بحياة الفلسطيني امر طبيعي مفروغ منه حتى لما يكون هالروتين عذاب يومي او لحظي ، حتى لو كان موت واحتلال وقتل ورعب وصبر وعذاب وصمود، يعني مثلا مش اول مرة غزة بتتحاصر والشهداء بتساقطوا واحد تلو الاخر، مش اول مرة بتتقطع قلوب الي في جنين على الي بغزة والي بنابلس على الي بالخليل دوامة الموت بتتنقل من مدينة لمدينة ومن قرية لثانية وعلى راي فلان الفلاني "الطيارة لما تضرب ما بتعرف حد"، ما بتميز بين فتح وحماس بين مدني وفلاح رجل ومرأة طفل وشيخ الي بتعرفه الطيارة انو المستهدف فلسطيني.

مش أول مرة بتفرجوا العرب والمجتمع الدولي على فيلم الدماء الفلسطيني ولا أول مرة بطلعوا الغاضبين بمظاهرات تقمع من البداية..

مش اول مرة بنبكي وبنتألم ولا أول مرة بنصرخ يا عرب يا عالم يا انسانية، ومش اول مرة بنحتج وبنتظاهر بدون ما حد يسمعنا...

مش اول مرة يقصف طفل رضيع بحضن امه ولا اول مرة بتموت عائلات بصغارها وكبارها

مش اول مرة بنستجدي الرحمة من كل البشر، ولا اول مرة غزة بتتحاصر ولا اول مرة بصمدوا اهلها ولا اول مرة بفشل قرار ادانة قتل الفلسطينية في مجلس الامن...

مش أول مرة بمطر الصيف وبسخن الشتا ولا أول مرة بزهر اللوز احمر من دماء الابرياء...

غزة جرح فينا لسه بنزف مثل ما نزفت جنين ونابلس ورام الله؛ فيها اهلنا وفيها كرامتنا وقوتنا وعزيمتنا وصبرنا وتحدينا وعنفوانا الي ضيعه الاقتتال الداخلي لكن في قلوبنا ما ضاع

مش اول مرة بنقول لغزة شدي حيلك يابلد ولا اول مرة بندعي لنصرة المقاومة والوحدة...

مش اول مرة ولا آخر مرة بنقول انه ما النا حد الا احنا، هالارض ارضنا ولازم احنا نحررها، يا ناس لا تقولوا عروبة ولا اسلام، خلي كل واحد بهمه وخلينا بهمنا

مش اول مرة بننتصر على ألمنا هاي بالذات عادتنا

واصبروا يا اهل غزة مثلما صبر اهل مخيم جنين واهل البلدة القديمة في نابلس اصبروا مثلما صبر الرئيس ياسر عرفات ولكن لا تسمحوا للنهاية أن تكون الهزيمة.

اصبروا وقلوبنا بعد الله معكم اصبروا حسبنا الله ونعم الوكيل.